Сo дијабетес, најважно е да се следи здрава исхрана и да се координираат оброците со терапијата, но подеднакво е важно да се разбере како одредени видови храна можат да влијаат на лековите.
„Лековите за дијабетес се дизајнирани да дејствуваат на многу специфичен начин за контрола на шеќерот во крвта“, објаснува фармацевтката Елаина Росарио за EatingWell.
Таа додава дека храната може да го промени начинот на кој се апсорбира лекот или колку силно делува.
Ребека Емч, исто така фармацевт, истакнува дека интеракциите варираат во зависност од видот на лекот, но најчесто проблемот се јавува кога храната дејствува спротивно на нејзината намена.
„Ако земате лек за намалување на шеќерот во крвта, а потоа јадете храна што брзо го зголемува, создавате конфликт во вашето тело“, вели таа.
Значи, според експертите за здравје и исхрана, ова е листа од пет работи што не одат добро со вашите лекови за дијабетес.
Храна богата со масти
Иако незаситените масти можат да бидат корисни, премногу заситени масти го зголемуваат ризикот од дијабетес тип 2 и можат да влијаат на ефикасноста на лековите.
„Масната храна го забавува варењето на храната и со тоа ја одложува брзината на дејството на лековите“, објаснува нутриционистката Дарија Зајац.
Примерите вклучуваат полномасни млечни производи, преработено месо, пржена и печена храна. Росарио забележува дека масната храна може да ги зголеми несаканите ефекти на лекови како што се агонистите на GLP-1, вклучувајќи гадење и лошо варење.
Храна со додаден шеќер
Слатките, газираните пијалоци, десертите и овошните сокови го отежнуваат стабилизирањето на нивото на шеќер во крвта од страна на лекот.
,,Тие не го спречуваат дејството на метформинот, но многу го отежнуваат одржувањето на стабилни нивоа на гликоза“, вели таа.
Експертот за грижа и едукација за дијабетес, диететичар и нутриционист Кари Рајкер додава дека е подобро да се изберат цели извори на јаглехидрати богати со растителни влакна, како што се грав, леќа, интегрални житарки и овошје.
„Квалитетот и количината на јаглехидрати се важни“, нагласува таа.
Високо преработени јаглехидрати
Белиот леб, засладените житарки, печивата и слична храна може да предизвикаат нагло зголемување на шеќерот.
,,Ако земате инсулин или лек што делува со оброк, тој нагло скок го отежнува балансирањето и може да доведе до нагло опаѓање“, вели Росарио. Џошуа Џ. Нојмилер од Американското здружение за дијабетес (ADA) препорачува избор на минимално преработени извори на јаглехидрати кои содржат влакна.
Кофеин
SGLT2 инхибиторите делуваат така што го елиминираат вишокот шеќер преку урината. Бидејќи кофеинот има и диуретско дејство, прекумерната консумација може да го зголеми овој ефект. Се препорачува да не се надминуваат 400 милиграми кофеин дневно, што е околу три до четири шолји кафе.
Алкохол
„Луѓето што земаат лекови за дијабетес треба да го ограничат алкохолот“, предупредува Зајац.
Алкохолот го зголемува ризикот од хипогликемија, особено кај оние што земаат инсулин или сулфонилуреа, бидејќи го спречува црниот дроб да ослободува гликоза во крвта. Рајкер додава дека алкохолот може да ги влоши несаканите ефекти на метформин и да го зголеми ризикот од дехидратација и сериозни компликации како што е кетоацидоза кај оние што земаат SGLT2 инхибитори. ADA препорачува не повеќе од две пијалоци дневно за мажи и едно за жени.
За да бидете безбедни, експертите советуваат правилно координирање на оброците и лековите, одржување на хидратација, контролирање на големината на порциите и редовно следење на нивото на шеќер во крвта со глукометар.
„Важно е да соработувате со вашиот лекар или фармацевт за да ги разберете можните несакани ефекти и подобро да го контролирате шеќерот во крвта“, заклучува Рајкер.