Претседателот на СДСМ, Венко Филипче денеска изјави дека лидер на албанската политичка партија повикот за лидерска средба го нарече губење време.
„Ги повикав сите шефови на политички партии на состанок и се сеќавам, шеф на албанска партија рече дека ќе биде губење време и сега нè обвинуваат за некаква моноетничка средба.”
Ова го истакна претседателот на СДСМ, Венко Филипче, одговарајќи на новинарско прашање во врска со обвинувањата од албанскиот блок политички партии дека вчерашната средба во Владата со премиерот Христијан Мицкоски била план за моноетничка соработка.
„На таа средба ги претставував СДСМ а премиерот Христијан Мицкоски ВМРО-ДПМНЕ и се сретнавме како лидери на двете најголеми партии од македонскиот блок, истовремено премиерот Мицкоски прв без приговор ја прифати поканата за средбата“, изјави денеска Филипче.
Тој уште еднаш упати јавен апел до сите политички партии да организираат лидерска средба.
Филипче истакна дека никој нема право да го обвинува СДСМ за етнички или националистички политики или пристапи, имајќи предвид дека во извршниот одбор на СДСМ има Албанка, Македонка муслиманка, додека во следниот период ќе има и Ром.