Владата на Финска, која е членка на НАТО, сака да ја зголеми старосната граница за своите воени резервисти на 65 години, соопшти во среда, што би додало 125.000 војници во нејзините воени сили и би го зголемило бројот на резервисти на еден милион до 2031 година.
Воената служба е задолжителна за мажите во Финска, која се приклучи на западниот воен сојуз пред две години како одговор на инвазијата на соседна Русија во Украина.
Жените можат да аплицираат за воена служба на доброволна основа. По воената служба, регрутите се собираат во резерва, објавува „Телеграф“.
Мажите моментално се должни да отслужат воена служба до 60-годишна возраст, но владата испрати нацрт-предлог за зголемување на старосната граница за коментари.
„Одбранбениот капацитет на Финска се базира на општо регрутирање, обучена резерва и силна волја за одбрана на земјата“, изјави министерот за одбрана Анти Хакканен.
„Со зголемување на максималната возраст за резервистите, им даваме можност на повеќе луѓе да учествуваат во националната одбрана“, рече тој.
Финската воена резерва моментално брои 870.000 војници, а промената на возраста би го зголемила бројот на околу еден милион до 2031 година.
Владите предлози во Финска се испраќаат за коментари до заинтересираните страни, пред да бидат доставени до парламентот за пратениците да дискутираат и на крајот да гласаат за нив.
Задолжителната воена служба во Финска трае 165, 255 или 347 дена, а најдолгиот период важи за офицери, подофицери и регрути кои се обучуваат за особено тешки задачи.