Владата на САД има разузнавачки информации кои покажуваат дека Русија стои зад минирањето на браната „Нова Каховка“, според тврдењата на двајца американски и еден западен функционер, објави NBC.
Администрацијата на претседателот на САД, Џо Бајден, како што се наведува, работела на декласификација на некои разузнавачки податоци и нивно разбирање уште во вторникот попладне.
Еден западен функционер истакнал дека уривањето на браната веројатно ќе им отежне на украинските сили да ја преминат реката.
Во исто време, Андриј Јермак, началникот на кабинетот на украинскиот претседател Володимир Зеленски, вели дека не разбира како може да постои сомнеж дали руските сили ја разнеле браната „Нова Каховка“. Во изјава за The Guardian, високиот помошник на Володимир Зеленски вели дека браната не можела да биде уништена со гранатирање или „какво било друго надворешно влијание“.
„Утринава во 02:50 часот руските сили ја разнесоа хидроцентралата ‘Каховка‘ и нејзината брана. Не разбирам како може да има никаков сомнеж во тоа. Двете структури се наоѓаат на територии под привремена руска окупација. Ниту гранатирање, ниту друго надворешно влијание може да уништи такво нешто. Експлозијата дојде одвнатре“, се вели во соопштението на одговорниот на администрацијата на украинскиот претседател.
„Знаеме дека руските сили ја разнесоа хидроелектраната во првите денови од инвазијата, така што однапред смислена експлозија е единственото веродостојно објаснување. Сите алтернативни теории не се ништо помалку од лажни руски пропагандни наративи“, додаваат оттаму.
Олексеј Данилов, секретарот на Украинскиот совет за национална безбедност и одбрана, во меѓувреме, дури и точно ја именуваше руската единица за која тврди дека ја разнела браната. Тој тврди дека за делото е одговорна руската 205-та моторизирана бригада. Во коментар за украинскиот медиум LIGA, тој тврди дека членовите на бригадата биле стационирани во електраната во близина на „Нова Каховка“ под руска окупација и ја контролирале централата.
Даша Заривна, висок советник во украинскиот претседателски кабинет, родена и израсната во Херсон, вели дека ова е руско воено злосторство. „Бомбардирањето на браната е уште едно без преседан руско воено злосторство против Украина, кое ќе има катастрофални последици и за нејзиното население и за другите земји. Тоа вклучува еколошки и економски последици, висок ризик од радиоактивно зрачење и дополнително сериозно нарушување на безбедноста на храната“, објаснува таа.
„Минатиот октомври, претседателот Володимир Зеленски кажа: ‘Сите светски лидери треба да и дадат до знаење на Русија дека терористичкиот напад на хидроцентралата ‘Каховка‘ ќе се поистоветува со употреба на оружје за масовно уништување’. Важно е терористичката држава да се изолира како целосно. Сите економски врски со Русија надвор од хуманитарните активности треба да се сметаат за учество во нејзините воени злосторства“, додава Даша Заривна во коментар за украинските медиуми.