Министерот за здравство, Фатмир Меџити, денеска ја посети Клиниката за државна кардиохирургија каде е хоспитализиран пациентот кој пред пет дена доби нова шанса за живот по извршената трансплантација на срце.
„Четириесетгодишниот пациент од Скопје, во чии гради сега чука ново срце благодарение на хуманоста на едно семејство, во моментот е во стабилна здравствена состојба. Министерот Фатмир Меџити изрази голема благодарност до лекарскиот тим и до семејството на дарителот кое го препознало органодарителство како највисок акт на хуманост“, соопшти Министерството за здравство.
Фатмир Меџити истакна дека сме сведоци на историски чин во македонското здравство, затоа што првпат од еден донор беа експлантирани четири органи и четири пациенти добија шанса за поквалитетен живот.
„Сите пациенти во моментот се стабилни и сакам да изразам огромна благодарност, како до хуманото семејство на дарителот, така и до сите здравствени работници. Нашите здравствени работници се големи професионалци кои безрезервно се заложија и успеаја да спасат четири животи“, истакна министерот.
Нагласи дека е горд на овој значаен успех во македонското здравство и на сите пациенти им посака брзо и лесно закрепнување.
Како што наведува МЗ во соопштението, Фатмир Меџити ги охрабри здравствените работници да продолжат посветено да работат и да се борат за квалитетен живот за секој пациент.
„Свеста за органодарителството расте и се повеќе семејства се одлучуваат да ги донираат органите на своите блиски во време на голема тага кога губат свој близок. Овие луѓе ја заслужуваат нашата најголема почит“, рекол Фатмир Меџити.
Од 2020 година досега имало вкупно 19 донори на органи, а од нив се трансплантирани 34 бубрези, три црни дроба, направена e 21 експлантација на коскени ткива и извршена е трансплантација на девет срца, со што, потенцира МЗ, направен е значаен напредок во здравствениот систем.