Претседателот на Украина, Володимир Зеленски, вети дека Армијата под негова команда ќе одговори со „целосно праведна одмазда“ на вчерашното руско гранатирање на регионот Херсон, во кое животот го загубија најмалку седум лица, вклучително и едно новороденче.
„Нашите воини ширум земјата возвраќаат на теророт на окупаторот. Не поминува ниту еден ден да не одговориме на руското зло со сосема праведна одмазда“, изјави Володимир Зеленски во своето редовно вечерно обраќање.
Министерството за одбрана на Русија вчера извести за уште еден напад со украински беспилотни летала врз регионот Белгород долж границата со Украина, како и за гранатирање на северниот регион Курск.
Во саботата, голем облак од чад беше забележан како се издига во близина на мостот Керч, кој го поврзува полуостровот Крим со Русија, откако два проектила беа соборени од руските сили за воздушна одбрана.
„Го уништивме секој окупатор, ја запаливме секоја руска опрема, гори пожар во нивните штабови и магацини. Чад има и на мостот Керч и многу други работи, сето тоа докажува дека ќе одговориме на секое од руските злосторства“, порача Володимир Зеленски.