Пратеникот на Алијансата за Албанците денес во изјава за медиумите истакна дека партијата не побарала разрешување на министритe за здравство и за информатичко општество и администрација, Фатмир Меџити и Азир Алиу.
„Сакам да известам дека Алијансата за Албанците не побарала такво нешто од Владата, од господинот Талат Џафери како технички премиер на оваа Влада. Органите на АА стојат позади министрите Алиу и Меџити и Централното собрание и Претседателството. Тоа се докажа и сношти каде што од 29 членови на Претседателството 17 беа присутни и физички“, вели тој.
Халил Снопче изјави дека вчера донеле одлука за поддршка на повикот на Арбен Таравари на следните избори да коалицираат со албанската опозицијата.
„Одлуката нема врска со нашето партнерство во оваа Влада. Ако се случи такво нешто, сакам да кажам дека ние немаме ниту една обврска кон договорите со оваа Влада и со СДСМ и со никој друг. Значи, тие сами решаваат да не’ избркаат од Владата, нешто слично како што се случи во 2017 година. Интересен факт е дека ова се случува под диригентска палка на Артан Груби и по се изгледа тие луѓе, нашите сопартијци што не се согласуваат со повикот на нашиот претседател на следните избори да одиме заедно со опозицијата значи преку Артан Груби сакаат да направат пуч во партијата и очигледно имаат избрано еден вршител на должност на претседател на таа група кој што е Артан Груби. Видовте, ние го споделивме со медиумите дописот на Артан Групи со директорите, вчера мислам дека ТВ 21 објави дека им наредува да не примаат никаква наредба од министерот Меџити се додека не се избере новиот наш министер. Значи, кој е тој наш министер што се избира? Значи, дали ДУИ ќе има двајца други министри. Значи, колку што има плус двајца. Тоа не е барање на АА и уверувам дека СДСМ самоволно како во 2017 година ако се случи такво нешто значи се откажува соработката со АА и ние нема да имаме никаква обврска кон договорените работи со СДСМ“, кажа тој.
Според Халил Снопче кадровска комисија нема ингеренции да предлага до Владата.
„Кадровска комисија не може да предлага до Влада. Која е кадровската комисија? Ингеренциите на таа комисија се само да за да може да предложи до Претседателството на Алијансата за именување и разрешување на кадри. Нема никаква друга ингеренција. Затоа велам дека е извршен пуч. Порака до Ковачевски да внимава бидејќи ние не сме должни да почитуваме никаков договор со СДСМ и Владата“, вели Халил Снопче.
Тој додаде дека ниту Арбен Таравари, ниту, како што кажа членовите на Центраното собрание кои вчера застанале зад партискиот претседател утре нема да присуствуваат на Централното собрание закажано од Зијадин Села.