Официјални лица соопштија дека пет лица се хоспитализирани откако хеликоптер се урна во градот Хантингтон Бич, Јужна Калифорнија.
Шокантните снимки го покажуваат моментот кога хеликоптерот одеднаш ја губи контролата во воздух и почнува да се движи спирално, на крајот губејќи надморска височина и удирајќи во ред палми додека запрепастените туристи и посетители на плажата гледаат, објавува Телеграф.
Неколку видеа што кружат на интернет го покажуваат хеликоптерот како паѓа кон работ на плажата, пред да се заглави меѓу палми и скалите на пешачки мост што го преминува автопатот на брегот на Пацификот во блиското одморалиште, објави CBS.
Противпожарната служба на Хантингтон Бич изјави за Асошиејтед прес дека меѓу хоспитализираните има две лица во хеликоптерот, кои биле „безбедно извлечени од остатоците“, како и уште три лица на патот.
Си-Би-Ес објави дека меѓу повредените има и едно дете. Природата на повредите сè уште е непозната, објавува Телеграф.
Инцидентот се случил околу 14 часот во саботата, а хеликоптерот сè уште бил заглавен меѓу скали и палми повеќе од два часа подоцна, и покрај големото присуство на полиција и затворените патишта.
Според извештаите, на паркингот во близина на местото на несреќата имало уште неколку хеликоптери. „Ексклузивна забава за слетување на хеликоптери“ се одржувала во блискиот салон „Офшор 9 Роуптоп“, во саботата попладне, каде што присутните биле поканети да „ги видат хеликоптерите како пристигнуваат одблизу“ пред добротворниот настан.
Причината за несреќата сè уште е нејасна. Градските власти за Си-Би-Ес изјавија дека Федералната администрација за воздухопловство и Националниот одбор за безбедност во сообраќајот се известени за несреќата.