Холандската национална библиотека во Хаг повикува на поголема соработка меѓу институциите за културно наследство за справување со физичките и онлајн заканите, откако крадци украдоа неколку ретки книги.
Според странските медиуми, книгите биле украдени во 2023 година, но грабежот досега не е објавен поради тековната полициска истрага.
Европол се сомнева дека грабежот е дело на грузиска банда која е активна низ цела Европа.
Досега не се пронајдени докази, но експертите велат дека кражбата на книги се вклопува во целта на бандата да краде „руска историска и патриотска литература“.
Сега кога истрагата стигна до „ќорсокак“, директорката на библиотеката, Вилма ван Везенбек, се надева дека јавноста може да помогне.
„Сакаме книгите да ни бидат вратени. Можеби некој има информации“, рече таа.
Библиотеката ја објави кражбата на својата веб-страница, со совети како да се идентификуваат книгите.
Меѓу книгите се и неколку публикации од почетокот на 19 век.
Библиотеката не соопшти колку вредат, но Европол проценува дека вкупната вредност на 170-те книги украдени во Европа е околу 2,5 милиони евра.
Начинот на дејствување на крадците варирал од земја до земја, соопшти Европол.
Тие честопати ги фотографирале делата за „студиски цели“, користејќи ги фотографиите за да ги постават копиите на нивно место при следната посета.