Тим на истражувачи од Универзитетот Лајден откри дека дел од генетскиот материјал игра клучна улога во развојот на дијабетес тип 1, ова може да го отвори патот за нови третмани, па дури и лек, беше објавено во научното списание Cell.
Дијабетес тип 1 се јавува кога панкреасот не може да произведе доволно инсулин, хормон кој е клучен за регулирање на нивото на шеќер во крвта, па луѓето со дијабетес мора секојдневно да инјектираат инсулин за да одржат рамнотежа. Еден од научниците кои работеле на истражувањето, кој и самиот боледува од дијабетес, рекол дека досега никој не се осврнал на причината за болеста, туку само на симптомите, пишува NL Times.
Истражувањата покажаа дека постојат две генетски варијанти кои влијаат на ризикот од развој на болеста. Луѓето со една варијанта на ген се заштитени од дијабетес, додека луѓето со друга варијанта доживуваат уништување на бета клетките во панкреасот, што доведува до развој на болеста.
Овој механизам дава основа за развој на нови терапии кои би можеле да ја таргетираат причината за болеста.
Научниците веруваат дека генската терапија, која би исправила само една промена во ДНК, би можела да биде клучна за лекување на дијабетес тип 1 Истражувачите укажуваат и на можноста за користење на матични клетки за создавање на нови бета клетки, кои би можеле да помогнат во решавањето на проблемот со инсулинот.
Ова откритие се однесува исклучиво на дијабетес тип 1, додека дијабетес тип 2, кој е најчест облик, има различна причина, која е поврзана со нездравиот начин на живот. Според сегашните податоци, повеќе од 100.000 луѓе во Холандија страдаат од дијабетес тип 1, додека бројот на луѓе со дијабетес тип 2 надминува еден милион.