Претседателот на ВМРО-ДПМНЕ, Христијан Мицкоски, денес заедно со потпретседателот Тимчо Муцунски, членот на ИК и пратеник Антонијо Милошоски, и координаторот на пратеничката група на партијата во Собранието оствари средба со Георг Вуцас, амбасадор на Австрија, амбасадорот на Република Чешка во Македонија Јарослав Лудва, како и амбасадорот на Словачка Хенрик Маркуш.
„Средба беше од подготвителен карактер пред посетата на министрите за надворешни работи на Република Австрија, Словачка и Чешка која треба да се одржи во четврток во Македонија“, соопшти партиската прес-служба.
На средбата се разговараше за актуелната политичка и економска состојба.
Христијан Мицкоски ги информира амбасадорите за актуелната политичка состојба во државата, посочувајќи дека – „Владата на СДСМ и Димитар Ковачевски се гушат во криминални скандали и афери, а на сметка на тоа граѓаните секојдневно тонат во сиромаштија“.
„Од страна на Христијан Мицкоски е истакнато дека довербата на граѓаните во правосудните органи е на многу ниско ниво и оправдана, бидејќи владата на СДСМ и ДУИ ги контролира истите, а како што рече за тоа најдобра потврда доаѓа и од САД. Христијан Мицкоски уште еднаш го афирмираше ставот на партијата дека потребни се предвремени парламентарни избори. Претседателот Христијан Мицкоски се заблагодари за досегашната поддршка и пријателскиот однос на Република Австрија, Чешка и Словачка кон Македонија, истакнувајќи дека соработката треба да продолжи и да се интензивира. На крај, претседателот Христијан Мицкоски му се заблагодари на амбасадорот Вуцас за севкупниот дипломатски ангажман во Македонија и му посака успех на личен и професионален план“, се наведува во соопштението од ВМРО-ДПМНЕ.