Американскиот претседател Доналд Трамп се закани дека ќе воведе царини од 200 отсто на сите алкохолни производи кои доаѓаат од Европската унија, вклучително и француското вино и шампањот, пишува Newsweek.
САД се еден од најголемите увозници на европско вино и алкохолни пијалоци, па Трамп игра на таа карта во трговските преговори. Франција, особено, има корист од големиот извоз на вино во САД.
„Европската унија, една од најнепријателските даночни и тарифни нации во светот, формирана со единствена цел да ги искористи предностите на Соединетите Држави, штотуку постави гадна царина од 50 отсто на нашето виски“, напиша Трамп во средата наутро на својата платформа „Truth Social“.
„Доколку оваа царина не биде веднаш отстранета, САД наскоро ќе воведат царина од 200 отсто за сите вина, шампањ и алкохолни производи кои доаѓаат од Франција и другите земји на ЕУ “, напиша Трамп.
Трамп користи тарифи за да им наметне подобри трговски услови на американските компании или да ги заштити од она што тој го гледа како нелојална глобална конкуренција.
Говорејќи веднаш по објавата на Трамп за Truth Social, американскиот секретар за трговија Хауард Лутник за ТВ Блумберг изјави дека претседателот одговара „сила за сила“ како одмазда против трговските партнери како што е ЕУ.
Лутник рече дека САД „ќе го научат остатокот од светот на почитување“ кога станува збор за трговијата, велејќи дека иако можете да видите странски производи како автомобили во САД, не можете да видите американски автомобили на друго место поради нефер трговски услови.
Трамп во вторникот воведе царини за челик и алуминиум од ЕУ од 25 отсто , како што беше планирано. На 2 април ќе бидат воведени повеќе царини според планот на администрацијата на Трамп за реципрочни мерки ширум светот.
ЕУ возврати со сопствени царини за 28 милијарди долари на американски стоки што треба да пристигнат на 1 април.
Тие ќе бидат насочени кон широк спектар на американски извоз, вклучувајќи челик, алуминиум, текстил, апарати за домаќинство и земјоделски производи.
– Работните места се во прашање, цените ќе растат во Европа и во САД. Тарифите се даноци. Тие се лоши за бизнисот, а уште полоши за потрошувачите. Овие тарифи ги нарушуваат синџирите на снабдување. Тие внесуваат несигурност во економијата“, рече претседателката на Европската комисија Урсула фон дер Лајен во вторникот .