По денешниот напад на Москва, на социјалните мрежи се појавија снимки кои наводно го покажуваат моментот на експлозијата во и околу руската престолнина. Најмалку едно лице загина во нападите.
Руското Министерство за одбрана соопшти дека вкупно 337 украински беспилотни летала биле пресретнати или уништени во текот на ноќта во Москва и во девет други руски региони. Украина не го коментираше ова прашање. Во текот на ноќта, украинските власти пријавија напади со руски беспилотни летала врз Киев и неколку други региони.
Руските власти објавуваат фотографии направени по масовниот напад со дрон врз Москва и околината . Регионалниот гувернер Андреј Воробјов вели дека жртвите се од градовите Видноје и Домодедово, недалеку од главниот град, и дека се оштетени седум стана во една станбена зграда.
Гледајте во живо од улиците на Москва во следното видео:
„Денеска во 4 часот наутро започна масовен напад со беспилотни летала врз Москва и Московската област. Во моментов е познато дека едно лице загина, а три лица се повредени во областа Ленински во градот (Видное) и Домодедово (село Јам)“, изјави Воробјов.
Тој рече дека остатоците од беспилотните летала паднале врз станбена зграда во Раменскоје, при што се оштетени најмалку седум станови од 19 до 22 кат од зградата.
„Евакуирани се 12 лица, меѓу кои и три деца. Лекарите им пружиле помош на повредените на лице место. Некои од евакуираните се сместени во блиското училиште, додека останатите сега престојуваат кај роднините“, рече гувернерот.
Тој тврди дека руската авијација соборила повеќе од 60 дронови.