На денешен ден, 8 септември, Македонија го одбележува Денот на независноста – еден од најзначајните датуми во современата историја на државата. На овој ден во 1991 година беше одржан историскиот референдум на кој македонските граѓани масовно излегоа и со убедливи над 95% поддршка гласаа за самостојна и суверена држава.
Овој чин беше пресвртна точка во македонската историја – остварување на вековниот сон и стремеж за слобода, самостојност и државност. Народот тогаш ја покажа својата зрелост и единство, испраќајќи порака дека Македонија сака да го гради својот пат, својата иднина и своето достоинство.
Од тој момент започна процесот на меѓународно признавање и изградба на институциите на независната држава. 8 Септември не е само потсетник на историскиот чин, туку и симбол на заедништво, демократија и континуирана борба за подобра иднина.
Денот на независноста секоја година се одбележува со свечености низ целата земја – државни церемонии, полагање цвеќе на споменици и културни настани. Празникот е државен и неработен ден за сите граѓани.
Оваа 2025 година се навршуваат 34 години од независноста, а 8 Септември останува вечен симбол на слободата и државотворноста на македонскиот народ.
Честит Ден на независноста – нека живее Македонија!