Најмалку четири лица се убиени, а повеќе од 30 други се повредени во ноќешните руски напади низ повеќе региони на Украина, објавија регионалните власти утрово.
Државната служба за вонредни состојби на Украина во понеделникот информираше дека две од жртвите се во источниот регион Суми, додека друго лице загинало во јужниот регион Одеса. Четвртата жртва, маж, е пријавен во јужниот регион Херсон.
Нападите оставија повеќе од 30 повредени лица, при што поголемиот дел од повредите се пријавени во источните региони Харков и Днепропетровск.
Во главниот град Киев, руски беспилотни летала погодија неколку згради, иако не се регистрирани жртви, објави градоначалникот на Киев, Виталиј Кличко на Телеграм.
Руското министерство за одбрана, пак, изјави дека пресретнало и уништило 91 украински дрон во текот на ноќта. Осум од овие дронови биле соборени во Московскиот регион, додека повеќето биле пресретнати во областите што граничат со Украина.
Најновиот бран напади доаѓа само неколку дена откако Русија ја започна својата најголема офанзива со дронови и ракети врз Украина од почетокот на инвазијата во февруари 2022 година. Во петокот, руските сили лансираа 530 дронови и околу десетина ракети насочени кон Киев, напад во кој загинаа најмалку две лица.
Тензиите меѓу двете земји продолжуваат да ескалираат, при што двете страни се вклучуваат во сè поагресивни воздушни кампањи.