Францускиот претседател Емануел Макрон , британскиот премиер Кир Стармер, германскиот канцелар Фридрих Мерц и полскиот премиер Доналд Туск пристигнаа во Киев утрово за да ја поддржат Украина и да се заложат за мировен договор меѓу Киев и Москва, а наскоро ќе се сретнат и со украинскиот претседател Володимир Зеленски, објави француската телевизија BFM.
Макрон и уште тројца европски лидери се поканети на самитот „Коалиција на волјата“, што ќе се одржи денес во Украина.
Макрон, Мерц и Стармер утрово заедно излегоа од возот што ги донесе од Полска, а подоцна ќе се сретнат со Зеленски и Туск.
„На пат кон Киев. До Украина, до Европа“, напиша францускиот претседател синоќа на мрежата X.
Полскиот премиер објави видео од неговото пристигнување во Киев на истата мрежа утрово.
„Киев. Нè очекува важен ден“, објави тој.
Фридрих Мерц Емануел Макрон Кир Стармер на пат кон Киев
Фото: Танјуг/АП
За време на посетата, Макрон, Туск, Стармер и Мерц ќе го посетат плоштадот Мајдан во Киев за да „оддадат почит на бранителите на Украина кои беа убиени и ранети во војната предводена од Русија“.
Потоа, заедно со Зеленски, тој ќе учествува на виртуелен состанок со неколку меѓународни партнери, соопшти Елисејската палата.
Целта на нивната посета, како што е наведено, е да се потврди поддршката за повиците на претседателот на Соединетите Американски Држави, Доналд Трамп, за мировен договор.
„Заедно со Соединетите Американски Држави, ја повикуваме Русија да прифати целосен и безусловно 30-дневен прекин на огнот што би овозможил разговори за праведен и траен мир. Ја повикуваме Русија да престане да ги попречува напорите за постигнување траен мир“, се наведува во заедничка изјава на Макрон, Мерц, Туск и Стармер.
Лидерите наведуваат дека се „подготвени да ги поддржат мировните преговори што е можно поскоро“.
Според нивните изјави, на Украина мора „да ѝ се даде можност да го врати својот просперитет како безбедна, сигурна и суверена нација во рамките на нејзините меѓународно признати граници“.
Во четврток, Трамп го повтори својот повик за „безусловен 30-дневен прекин на огнот“ во Украина, што треба да доведе до „траен мир“.
Францускиот претседател последен пат ја посети Украина во јуни 2022 година, придружуван од тогашниот германски канцелар Олаф Шолц, претседателот на Италијанскиот совет Марио Драги и тогашниот претседател на Романија Клаус Јоханис.