Претседателот на Украина, Володимир Зеленски, во петокот објави дека неговата Влада ги отпушта одговорните лица на сите регионални воени центри за регрутирање во Украина, што е драматичен потег за сузбивање на корупцијата бидејќи очајно се потребни нови војници за да ги заменат убиените и ранетите во борбите, пишува весникот New York Times.
„Овој систем треба да го водат луѓе кои точно знаат што е војна и зошто цинизмот и поткупот за време на војна се предавство. Наместо тоа, на војниците кои го поминале фронтот или кои не можат да бидат во рововите затоа што се болни или изгубиле екстремитети, но го зачувале своето достоинство, може да им се верува на овој систем за регрутирање“, вели претседателот на Украина.
Володимир Зеленски вели дека борбата против корупцијата е приоритет, а потезите доаѓаат во време на напорите да се решат прашањата околу регрутирањето на војската.
Претходно оваа недела, Државното истражно биро на Украина објави дека отворило 112 случаи против владини претставници кои се товарат за криминал и корупција.
Бирото го приведе началникот на Киевскиот окружен територијален центар за регрутирање и социјална поддршка, кого не го именуваше, обвинувајќи го дека учествувал во креирањето на фиктивни документи во кои се тврди дека на мажите кои не се способни да служат им било дозволено да ја напуштат земјата – поткупот бил 10.000 долари по парче, пишува New York Times.
Бирото, исто така, го приведе началникот на еден од одделенијата за воена администрација во Киев, исто така неименуван јавно, обвинувајќи го за вадење документи за тројцата мажи.
Мажите на возраст меѓу 18 и 60 години не смеат да ја напуштат земјата од почетокот на инвазијата на Украина, а граничарите велат дека поединци секојдневно се апсат бидејќи се обидувале да го направат тоа.