Железото е исклучително важен минерал за човековото тело, и учествува во преносот на кислород до сите делови од него. Важно е да имаме четири грама железо во организмот, бидејќи помала количина може да доведе до анемија.
Симптомите на недостаток на железо вклучуваат замор, слаба концентрација, опаѓање на косата, вртоглавица, главоболка и депресија. Следуваат неколку начини на надоместување на железото во телото.
Од мешункастите и зрнестите плодови, леќата, гравот, граорот и леблебијата се одлични извори на железо и идеална замена за секој вегетаријанец. Во 100 грама грав и леќа, на пример има 10 милиграми железо.
Сите зеленчуци содржат железо, но спанаќот и брокулата се на врвот. Спанаќот ги содржи и витамините А, Е, Ц, калциум и растителни влакна. Брокулата содржи фолна киселина, како и витамини К и Ц.
Други зелени намирници со доволна количина на железо се коприва, магдонос, целер, цвекло, зелка, аспарагус… Јапонските шитаке печурки се добра замена, за луѓето кои не јадат месо. Поради својата висока хранлива вредност, оваа печурка е наречена „еликсир на животот“, а покрај железо, богата е и со селен, протеини и витамин Ц.
И житарките се одличен извор на железо. Се издвојуваат: овес, ориз, пченка, пченица, чија и киноа.
Меѓу овошјата, оние со најголема количина железо се цитрусите. Портокалите и лимоните содржат 0,6 мг. железо, во мандарините има 0,1 мг., а во грејпфрутот и кивито – 0,41 мг. Други овошја што вреди да се вклучат во дневното мени се суво овошје, јагоди, смокви, сливи, сок од слива, боровинки, лубеница, диња и манго.
Омилен меѓу јатките е индискиот орев, кој во 100 гр. содржи шест мг. железо. По него се кедровите ореви и сончогледот. Семките од тиква содржат не само голема количина железо, туку и витамин К, магнезиум, манган и цинк.
Меѓу зачините тука спаѓаат куркума, оригано, морско оревче, мајчина душичка, нане, кардамом, ким, црн бибер и цимет, кои содржат 8 мг. од оваа витална состојка.
Сто грама темно чоколадо содржи 17 мг. железо. Тука се говори за тоа чоколадо што содржи најмалку 70 насто какао.
Во жолчката од јајцето, исто така, има доста железо – 100 гр. содржат 7,6 мг. од оваа состојка. Јајцата имаат и многу магнезиум и калциум.
Меѓу млечните производи, најголемата количина железо има во пармезанот и козјото сирење. Јогуртите и кашкавалите се меѓу последните, со нивната поголема содржина калциум, што спречува правилен внeс на железото.