Следната година ќе се изгласа новиот Закон за високо образование, кој ќе обезбеди повеќе можности и подобри можности за студентите и професорите, но и високо ќе ги подигне стандардите за квалитет што ќе треба да ги следат образовните институции, изјави министерката за образование Весна Јаневска .
„За жал, имаме студенти кои дипломираат со висок просек, а немаат ни знаење за шест. Поради нив, студентите кои дипломите ги стекнале со работа и знаење одлучуваат да заминат и да работат во сериозни фирми во странство“, рече Јаневска, додавајќи дека тоа е суштинска причина за започнување на големи промени во образованието на високото образование.
Јаневска посочи дека деновиве во владиниот систем ЕНЕР ќе се имплементира новиот Закон за националната рамка на квалификации, кој денеска е координиран со Секретаријатот за законодавство.
„Законот точно дефинира какви квалификации и вештини треба да поседуваат студентите и што можат да прават со тригодишните и четиригодишните универзитетски студии и не се дискриминирани ниту при вработување, ниту при остварување на други права. Потсетувам дека една од мерките што ги спроведовме по моето именување за министер е студентите со тригодишни универзитетски студии, односно со 180 ЕКТС, да можат да аплицираат за стипендија за втор циклус на студии во локалните високообразовни институции, бидејќи порано не им дозволуваа“, рече Јаневска.
Министерката изрази очекување новото законско решение да го изгласа Собранието до крајот на календарската година.