Џеф Безос и Лорен Санчез побараа од нејзиниот брат, Мајкл Санчез, речиси 190.000 долари за покривање на судските трошоци настанати во нивната долгогодишна правна битка.
Имено, износот изгледа мал во споредба со нивните неодамнешни трошоци, но двојката не се откажува од борбата, пишува Page Six.
Според документите поднесени во Вишиот суд на Калифорнија на 28 јули, милијардерскиот пар сака Мајкл да им исплати точно 182.374 долари за адвокатски трошоци и 8.182 долари за судски трошоци. Во барањето се додава дека тие заслужуваат надомест за поднесувањето на Мајкл на „несериозни тужби за кои знаел или требало да знае дека се осудени на пропаст од самиот почеток“.
Часовните хонорари на нивните адвокати се движеа од 549 до 1.125 долари. Семејната расправија започна кратко откако Безос објави дека се разведува од сопругата Мекензи Скот по 25 години брак, а медиумите ексклузивно ја открија неговата врска со Санчез, која тогаш сè уште беше во брак со холивудскиот агент Патрик Вајтсел.
Работите ескалираа кога „Нешнал Енквајер“ наводно се закани дека ќе објави експлицитни фотографии од Безос. Мајкл негираше дека им дал какви било фотографии на медиумите, но според „Њујорк тајмс“, тој и „Американ Медиа“ потпишаа договор за неоткривање во врска со „одредени информации, фотографии и текстуални пораки што ја документираат аферата меѓу Џеф Безос и Лорен Санчез“.
Во февруари 2020 година, Мајкл Санчез поднесе тужба против Џеф Безос, обвинувајќи го него и неговиот тим за лажно прикажување како лице кое им обезбедило на медиумите приватни пораки и материјали поврзани со врската на Безос со Лорен Санчез, за што тој тврдеше дека предизвикало штета на неговиот углед и бизнис. Судот во Лос Анџелес ги отфрли обвиненијата за клевета, заклучувајќи дека доставените докази не ги исполнуваат потребните законски критериуми и во голема мера се потпираат на несигурни или недозволени извори. На Безос му беше доделен дел од судските трошоци.
Потоа следеа многу дополнителни судски поднесоци и контратужби, вклучително и барања за трошоци. Сега Безос и Лорен Санчез бараат дополнителна отштета, тврдејќи дека Мајкл поднесувал неосновани и предрасудни барања што создале непотребни трошоци.
Барањето за надомест на трошоци доаѓа кратко по нивната раскошна, тридневна свадба од 50 милиони долари во Венеција, на која присуствуваа многу познати личности, меѓу кои Опра Винфри, Орландо Блум, Иванка Трамп. Братот и сестрата на Лорен, Пол и Елена, беа поканети на свадбата, додека Мајкл не беше.
Мајкл, со кого Лорен повеќе не разговара, ги нарече Безос и неговата сестра „лажговци и измамници“, а правосудниот систем „корумпиран“ и ја прогласи својата победа во спорот.