За да имаат доволно самодоверба за справување со разни предизвици во текот на животот, многу е важно децата да се чувствуваат сакани уште од најрано детство.
Безусловната љубов кон родителите и сигурноста што децата ја чувствуваат во нивно присуство е отскочна даска за сè што доаѓа подоцна, а зборовите можат да имаат
неверојатно влијание , особено кога доаѓаат од луѓето на кои детето најмногу им верува – мама и тато.
Експертите велат дека децата чии родители редовно покажуваат љубов, поддршка и разбирање имаат поголема самодоверба и емоционална стабилност. Затоа е важно секој ден на различни начини да им кажувате на вашите најмали колку ги сакате , а ние ви донесуваме неколку фрази со кои можете да ја изразите вашата безусловна љубов.
1. Те сакам, без разлика на сè
Оваа фраза му става до знаење на детето дека родителската љубов е постојана и не зависи од тоа како се однесува малото, дали успеало во нешто или не. Психолозите нагласуваат дека децата на кои родителите им ги упатуваат овие зборови развиваат сигурна врска со нив и чувство дека се сакани токму такви какви што се. Оваа порака е особено важна кога детето прави грешка или не успева.
2. Во ред е да се прават грешки, тука сум да помогнам
Наместо да казнува или критикува, оваа фраза покажува разбирање и подготвеност за поддршка . Експертите нагласуваат дека родителите кои реагираат на овој начин им помагаат на децата да развијат здрав став кон грешките и да се ценат себеси. Детето тогаш не чувствува срам , туку самодоверба и сигурност.
3. Многу сум среќен што сум твој родител
Оваа реченица изразува не само љубов, туку и гордост и благодарност . Тоа му дава на детето чувство дека е сакано не само за она што го прави, туку едноставно за тоа што постои. Според експертите, ваквите пораки го зајакнуваат идентитетот и чувството на припадност на детето, пренесува telegrafi.com.
4. Можеш да ми кажеш сè, јас секогаш ќе те слушам
Кога родителот јасно става до знаење дека е спремен да разговара, детето развива чувство на емоционална сигурност . Психолозите тврдат дека отворената комуникација во раните години ги поставува темелите за доверлив и искрен однос во адолесценцијата и зрелоста.
5. Ништо не може да ја промени мојата љубов кон тебе
Оваа фраза испраќа силна порака дека љубовта не е условена од однесување или достигнувања . На овој начин, детето учи дека родителот нема да го отфрли или да го сака помалку поради грешка. Според експертите, ваквите зборови го намалуваат стравот од осудување и поттикнуваат емоционална поврзаност и искреност во односот родител-дете.
Кога родителите редовно ги користат овие фрази, децата не само што се чувствуваат сакани, туку развиваат и чувство на доверба што ги обликува нивните идни врски и емоционално здравје.