Како што старееме, промените во когнитивните функции како што се меморијата и концентрацијата стануваат природен дел од животот. Многу луѓе по 60-годишна возраст забележуваат дека им е потешко да извршуваат повеќе задачи истовремено, да забораваат имиња или имаат тешкотии да ги запомнат вистинските зборови. Иако е фрустрирачко и вообичаено, тоа не значи дека мора да го трпите. Исхраната игра клучна улога во одржувањето на остриот ум, пишува EatingWell .
Не постои магична храна што ќе го спречи когнитивниот пад, но балансираната исхрана богата со хранливо вредни состојки може значително да го поддржи здравјето на мозокот.
„Исхраната насочена кон забавување на когнитивниот пад треба да даде приоритет на изворите на посни протеини, да го ограничи внесот на натриум и заситени масти и да вклучува овошје и зеленчук, маслиново масло, риба, јаткасти плодови и интегрални житарки“, објаснува нутриционистката Меди Паскариело.
Експертите издвојуваат шест намирници кои се особено корисни за когнитивните функции по 60-тата година од животот.
Масна риба
Лососот, скушата, сардините и харингата се богати со омега-3 масни киселини EPA и DHA, кои се директно поврзани со здравјето на мозокот. Овие корисни масти го намалуваат воспалението и ја поддржуваат когнитивната функција. „Консумирањето риба и омега-3 масти е поврзано со помал ризик од Алцхајмерова болест и мозочен удар“, вели нутриционистката Лорен Харис-Пинкус.
Боровинки
Ако сакате да размислувате побрзо, посегнете по боровинки. Една студија покажа дека луѓето над 65 години кои консумирале прав од боровинки дневно во текот на шест месеци доживеале подобрувања во брзината на ментална обработка. Ако не можете да најдете свежи, замрзнатите се исто толку добра опција. Нутриционистката Максин Јунг препорачува една до две порции бобинки дневно за оптимално здравје на мозокот.
Темнозелен лиснат зеленчук
Истражувањата покажуваат дека повеќето луѓе над 60 години не јадат доволно темнозелен лиснат зеленчук. Храната како спанаќ, кељ и раштан може да помогне во подобрувањето на учењето и меморијата. Се смета дека витаминот К е клучен за овој ефект, но и други хранливи материи како бета-каротен и витамин Е исто така играат важна улога.
Зеленчук од семејството брасика
Карфиолот, зелката и брокулата можат да го намалат ризикот од когнитивен пад што се зголемува со возраста. Една студија покажа дека луѓето кои јаделе најмногу зеленчук од ова семејство имале значително подобро когнитивно здравје. Авторите на студијата веруваат дека ова се должи на изобилството на антиоксиданси кои ги штитат чувствителните мозочни клетки од оштетување, како и на позитивните промени во цревната микробиота.
Јајца
Освен што се одличен извор на протеини, јајцата се богати со холин, хранлива материја неопходна за производство на ацетилхолин, невротрансмитер одговорен за меморијата и учењето. „Истражувањата сугерираат дека нискиот внес на холин е поврзан со поголем ризик од развој на деменција и Алцхајмерова болест“, вели Јунг. Едно големо јајце содржи околу 147 мг холин, а важно е да се напомене дека поголемиот дел од него се наоѓа во жолчката.
Ф’стаци
Ф’стаците се полни со антиоксиданси, особено флавоноиди, кои можат да го одржат мозокот остар. Докажано е дека ф’стаците го намалуваат ризикот од субјективен когнитивен пад, односно оние мали пропусти во меморијата што со текот на времето можат да се претворат во посериозни проблеми. Покрај тоа, ф’стаците се добар извор на растителни влакна, магнезиум и други важни минерали.