Јагодите, спанаќот и грозјето содржат најмногу пестициди меѓу овошјето и зеленчукот, а нивното редовно консумирање може да доведе до хормонални нарушувања, развојни нарушувања кај децата и проблеми со плодноста.
Избегнувањето на овошје и зеленчук со високо ниво на пестициди е важен чекор кон поздрав живот, особено кога е познато дека одредени видови храна содржат значителни количини на хемикалии кои можат да бидат штетни за здравјето.
Меѓу нив, јагодите и спанаќот повторно се најдоа на врвот на листата на производи со најмногу остатоци од пестициди.
Иако овошјето и зеленчукот се основа на балансирана исхрана, зголемената употреба на пестициди во конвенционалното земјоделство ја доведува во прашање нивната безбедност.
Важно е не само да се консумираат овие намирници , туку и да се обрне внимание на начинот на кој се одгледуваат.
Од 2004 година, непрофитната организација Environmental Working Group (EWG) годишно објавува список на земјоделски производи што содржат најмногу остатоци од пестициди, познат како „Валкани дванаесет“.
Според нивните најнови податоци, дури три четвртини од свежите конвенционални производи што ги тестирале содржеле траги од пестициди. За оние на самиот врв на листата, тој процент се искачува на 95 проценти.
Јагодите и спанаќот традиционално ги заземаат првите позиции, а оваа година вниманието го привлече и грозјето, кое доживеа ненадејно зголемување на присуството на пестициди.
Експертите предупредуваат дека некои пестициди можат да имаат сериозни последици по здравјето, особено кај децата и бремените жени.
Тие се поврзани со различни нарушувања, вклучувајќи развојни потешкотии, проблеми со учењето, па дури и ризик од спонтани абортуси и вродени дефекти.
Иако целосното избегнување на пестицидите е речиси невозможно, свеста за видовите производи што се најмногу третирани и преминувањето кон органска или внимателно измиена и подготвена храна може значително да придонесе за одржување на здравјето.