Компанијата TikTok, во сопственост на кинеската компанија Bytdance, најави дека утре ќе биде принудена да ги прекине сите активности во САД, доколку не добие јасна изјава од Белата куќа за нејзината иднина.
Соопштението дојде откако американскиот Врховен суд вчера го потврди законот со кој се забранува TikTok во САД, освен ако платформата не ги прекине врските со кинеската матична компанија Bytdance до недела, објави телевизијата ABC.
Американската администрација во петокот соопшти дека нема да ја спроведе потенцијалната забрана веднаш по истекот на рокот, оставајќи го спроведувањето на законот на новоизбраниот американски претседател Доналд Трамп, кој ќе ја преземе функцијата во понеделник.
Доналд Трамп, кој се спротивстави на забраната на апликацијата TikTok, рече дека ќе се обиде да ја поништи одлуката.
Сепак, TikTok рече дека пораките од администрацијата на американскиот претседател во заминување Џо Бајден не се доволно јасни.
Како одговор на кинеската компанија, официјален претставник на Белата куќа изјави за ABC доцна во петокот дека администрацијата на Бајден веќе направила големи напори да ја соопшти својата позиција и дека ќе зависи од администрацијата на Трамп да го спроведе законот.
Врховниот суд на САД во петокот го потврди законот со кој се забранува бизнисот на кинеската компанија TikTok, а забраната треба да стапи на сила веќе утре, 19 јануари.
Според законот, кинеската компанија Bytdance треба да ја продаде американската филијала на својата популарна социјална мрежа TikTok до 19 јануари или ќе се соочи со забрана во Америка.
Според пресудата, законот, кој минатата година беше изгласан од големо мнозинство претставници во Конгресот, и од редовите на републиканците и од демократите, не претставува кршење на Првиот амандман на Уставот на САД, кој ја штити слободата на говорот. , пренесува Ројтерс.
Врховниот суд ги сослуша аргументите од двете страни до 10 јануари, само девет дена пред истекот на рокот утврден со закон.
Апликацијата ја користат милиони Американци и е меѓу најпопуларните платформи во таа земја, а компанијата планира да ја затвори својата работа во САД доколку не дојде до пресврт во последен момент, велат извори на Ројтерс.
Трамп вчера изјави дека одлуката на американскиот Врховен суд „беше очекувана и сите мора да ја почитуваат“.
– Мојата одлука за апликацијата TikTok ќе биде донесена во блиска иднина, но треба да имам време да ја разгледам ситуацијата – рече Трамп во пораката на платформата Truth Social.
Трамп се противи на забраната на апликацијата во САД и верува дека токму оваа апликација му помогнала да привлече млади гласачи на претседателските избори во 2024 година.
Новиот советник за национална безбедност на Трамп, Мајк Волц, изјави во средата дека новоизбраниот претседател има намера да преземе чекори за зачувување на TikTok кога ќе се врати на функцијата, додаде агенцијата.