Австриската армија го претстави првото воено куче научено да го открива вирусот корона со мирисање на заштитната маска на заразените, соопшти австриското Министерство за одбрана.

Во соопштението се наведува дека белгиски овчар по име Фантази Форевер од Зеталблик учествува во програма што треба да открие дали кучињата можат да разликуваат здрави и заразени луѓе.

Привремен извештај за програмата потврди дека кучето навистина може да ги препознае маските на заразените лица, пренесе ТАСС.

Првата фаза на проверка на кучето преминува во практична фаза – се нагласува во соопштението.

Второто куче во моментов ја завршува првата фаза, додека уште две кучиња ќе ја научат оваа вештина до крајот на годината. Проектот се очекува да заврши во првото тромесечие од 2021 година, а пред тоа сите кучиња ќе поминат практични тестови на маските на заразените.

Министерството за одбрана сака да донесе заклучок дали е можно да се користат кучиња во реални услови, на пример на аеродромите.