Боб Дилан, познат како фолк-рок трубадур, чии песни станаа симбол на антивоените протести и движењето за човекови права од 60-те години на минатиот век, и кој се смета за еден од најголемите музички текстописци во Америка, го продаде сиот свој каталог на песни на компанијата „Universal Music Group“.

Како што синоќа соопшти компанијата, со договорот таа ги откупи правата на повеќе од 600 песни на Дилан, „од културниот темелник „Blowin’ in the Wind“од 1962 година, до овогодишниот еп „Murder Most Foul“.

Сите овие песни сега се во сопственост на медискиот гигант.

Според овој „пресвртен договор“, компанијата нема право да ја открива сумата што му е исплатена на Дилан, но извор запознат со договорот открива дека се работи за „девет цифрена бројка во вредност од повеќе од 200 милиони американски долари“, јави Ен-би-си.