Европската агенција за лекови, ЕМА издаде дозвола за користење на вакцината на Модерна во Европа, а конечната примена треба да ја одобри Европската комисија

Coronavirus | Impfstoff | Moderna

Вакцината на американската фирма Модерна, е втората вакцина која доби условно одобрение од Европската агенција за лекови, за користење во ЕУ, во сузбивањето на вирусот САРС-КоВ-2, а согласноста на Европската комисија се смета за сигурна. ЕМА, под притисок од земјите од Европската унија, значително ја забрза постапката на проверка на вакцината.

Серумот на Модерна има слично дејство како веќе одобрената вакцина на германската фирма Бионтек и нејзиниот американски партнер Фајзер, но ја има логистичката предност што може да се складира на температура од минус 20 степени наместо минус 70 степени целзиусови.

Двете одобрени вакцини се т.н. РНК вакцини, содржат код на вирусниот антиген кој кај организмот предизвикува имунолошки одговор. Клиничките студии потврдија ефикасност на вакцината на Модерна од околу 95 отсто, а таа од 21 декември веќе се користи во САД, како и во Канада.

ЕУ има извршено порачка од Модерна од 160 милиони дози вакцина.

Германија ќе добие надпропорционален удел од 50 милиони дози од порачаниот контингент, соопшти претставник на германското министерство за здравство. Причината е што  одделни земји од ЕУ не сакале да добијат вакцина од Модерна, со што се зголемува германскиот удел во порачката.