Сашо Мијалков го нема дома, го нема ни во Мериот. Во изминатите 15 години помина низ три фази: Во првата привилегиите и раскошот ги добиваше бесплатно. Во втората за уживањата мораше да плаќа. И сега влегува во трета фаза кога ќе мора да плаќа за слободата.

Тој тоа го знаеше и затоа во декември 2017 година на чело на ВМРО ДПМНЕ донесе човек од негова доверба-Христијан Мицкоски. Бидејќи колку и да чини да донесете еден анонимус на чело на партијата, секогаш многу поскапо чини да и плаќате на власта или на некои други држави за живот на слобода.

По операцијата Сашо го нема дома се можни ( најмалку ) 20 заклучоци:

  1. Ќе биде сменет министерот за внатрешни работи или самиот ќе си поднесе оставка.
  2. Ќе падне владата на Зоран Заев. Ќе се оди на нови избори или ќе се фомира некое ново мнозинство.
  3. Ќе има џандар збира во полицијата, во правосудството и во политичките партии.
  4. Во политичките процеси ќе се замеша Стево Пендаровски и ќе ги промаши процесите како и секогаш во животот.
  5. Сашо Мијалков, Никола Груевски и Христијан Мицкоски се цело време во комуникација. Без разлика дали таа комуникација ја прават директно или преку посредници. Јордан Камчев, на пример
  6. Сашо Мијалков му ја спаси фотељата на Христијан Мицкоски по губењето на изборите на 15 јули. Мицкоски требаше да биде сменет на 16 јули, а не на 28 март.
  7. Мицкоски побара да падне владата поради бегството на Мијалков, но не побара да падне владата по бегството на Груевски, кој е патем речено осомничен дека украл од партиската каса на ВМРО ДПМНЕ 1,3 милиони евра за купување плац на Водно.
  8. Заев ќе мора да расчисти, а не да пактира со груевизмот ако сака да остане на власт.
  9. Христијан Мицкоски и Александар Николоски се деца на груевизмот.
  10. Ако Заев не може да расчисти со груевизмот, тогаш тоа нема да значи враќање на груевизмот, туку замена на заевизмот со некој друг “визам” кој ќе може подобро да се справи со тоа.
  11. Груевизам е тоа што странците го нарекуваат заробена држава.
  12. Бегството на Мијалков, бегството на Груевски и рушењето на СЈО е борба на заробената држава да остане жива. Тоа се прави преку “нашето дете” на груевизмот-Христијан Мицкоски.
  13. Заев треба да ја смени целата своја пи-ар екипа бидејќи дозволи во јавноста да се наметне сликата дека Мијалков е партнер на Заев, а не човек кој го донесе и го држи Мицкоски на чело на ВМРО ДПМНЕ.
  14. Бегството на Груевски, бегството на Мијалков, како и рушењето на СЈО Заев треба да ги третира како мини државни удари на заробената држава.
  15. Ако Заев не ги третира тие три случаи како мини државни удари на заробената држава, тогаш тој ќе биде политички осуден како соучесник во тие процеси.
  16. Таип Ердоган сам го креираше пучот во 2016 година за да расчисти со Фетулах Гулен.
  17. Заев имаше долго време, по хаваријата со СЈО, да одлучи дали ќе биде Ердоган или Фетулах Гулен.
  18. Ќе има големи апсења и чистки во Македонија.
  19. Политичка криза пред решавање на косовското прашање е анти-македонска стратегија.
  20. За да бидеш премиер на една ваква држава не можеш да имаш пријатели, бидејќи сите ти се непријатели. Некој таа лекција ја учи побрзо, некој ја учи поспоро. Некој плаќа поскапа, а некој поефтина цена. Но сите мора да го платат така изедениот ручек.