Додека Европа со нетрпение ги чека првите дози на вакцината против „ковид-19“, уште поголемо внимание е насочено кон новиот вид на коронавирус САРС-КоВ-2, кој брзо се шири низ Лондон и југо-источна Англија. Светската здравствена организација (СЗО) ќе свика состанок на членовите за да разговара за стратегиите за борба против новиот вид на коронавирус што се покажува позаразен од претходните верзии.

Видот Б 1.1.7 беше откриен во средината на октомври кога научниците од конзорциумот Cog-UK го прочитаа генетскиот код на коронавирусот во два примерока собрани во Кент и Лондон на 20 и 21 септември. Тие беа изненадени кога открија дури 17 мутации во однос на оригиналниот вид на коронавирус од Вухан. Од тие 17 мутации, осум се на ген кој го кодира клучниот С протеин преку кој вирусот влегува во клетката.

Научниците претпоставуваат дека повеќе мутации се случиле кај еден пациент со сериозно ослабен имунолошки систем. Тој пациент неколку недели се борел против ковидот дозволувајќи еволуирање на коронавирусот, а потоа тој вид заразил друго лице.

Сите вируси мутираат. Забележаната стапка на мутација кај коронавирусот е две мутации месечно, што е побавно отколку кај вирусот на грип.

Новиот вид брзо се „размножи“ во Лондон и југо-источна Англија, потиснувајќи ги постарите верзии. Тој беше одговорен за 28 проценти од инфекциите во Лондон на почетокот на ноември и во моментов е поврзан со 80 проценти од случаите на инфекција во британската престолнина. Тој е присутен, но многу помалку, во Шкотска, Велс и остатокот од Англија. Надвор од островот, идентификуван е новиот вид во Данска (девет случаи), Австралија (два) и Италија, Холандија и Исланд (по еден). Но, научниците веруваат дека вирусот се шири многу повеќе отколку што покажуваат сегашните податоци.

Компјутерско моделирање на ширење на вируси сугерира дека Б.1.1.7 може да биде дури 70 отсто позаразен од другите видови што циркулираат во Велика Британија. Ова ја прави епидемијата на коронавирус во Велика Британија исклучително тешко да се држи под контрола без строги мерки за заклучување.

Некои специфични мутации на видот Б.1.1.7 исто така може да ја олеснат инфекцијата кај луѓето. На пример, една мутација наречена N501Y го менува најважниот дел од С протеинот што стапува во прв контакт со клеточната површина на нашето тело. Секоја промена што го олеснува влегувањето на вирусот во организмот, веројатно ќе му даде предност во заразувањето со луѓе. Патем, мутацијата N501Y веќе беше забележана во април во Бразил, а потоа и во некои други земји.

Во моментов нема докази дека новиот вид предизвикува болест различна од онаа предизвикана од претходните верзии на коронавирусот, изјави за Фајненшел тајмс, Питер Опеншау , професор по експериментална медицина на Империјал колеџ. Прелиминарните клинички податоци покажуваат дека видот Б.1.1.7 влијае на вирусното оптоварување, односно количината на вирус што влегол во организмот преку горниот респираторен тракт. Но, тоа е исто така карактеристика на сојот на коронавирус наречен 501. V2, кој се разви независно во Јужна Африка.

Вакцините развиени од Pfizer и BioNTech, Moderna и Oxford и AstraZeneca постигнуваат заштитен ефект со „тренирање“ на нашиот имунолошки систем да препознае многу различни места на С протеинот на коронавирусот. Експертите не очекуваат мутации во Б.1.1.7 за да се намали ефикасноста на вакцините. „Вакцините предизвикуваат неутрализирање на антитела на неколку делови од С. протеинот, а повеќето од нив не би се менувале со мутации, па вакцините сепак ќе бидат ефикасни“, рече Даниел Алтман , професор по имунологија на Империјал колеџ , за „Фајненшл тајмс“.

За разлика од претходните соеви на коронавируси, децата се чини дека се подложни на инфекција со варијанта Б 1.1.7 во иста мера како и возрасните.

– Постои навестување дека новиот вид има поголема склоност да ги инфицира децата од претходните. Не ја утврдивме причината за ова, но можеме да го прочитаме од податоците што ги имаме досега – изјави за Ројтерс епидемиологот Нил Фергусон , професор на Лондонскиот империјален колеџ. Затоа Велика Британија објави дека училиштата може да останат затворени во јануари во таа земја.