Судот во Анкара ќе бара дополнителни информации за екстрадицијата на Палевски

Судот во Анкара ќе бара дополнителни информации за екстрадицијата на Палевски

Делегација предводена од министерот за правда Кренар Лога на 8 февруари ќе престојува во Анкара каде ќе има средби со официјални претставници на Турција, а едно од прашањата за кое ќе се разговара е екстрадицијата на Љупчо Палевски, осомничениот за убиството на Вања Ѓорчевска и Панче Жезовски.

Техничкиот премиер Талат Џафери во интервју за АИМ вели дека не сака да прејудицира дали овие разговори можат да ја забрзаат екстрадицијата на Палевски, но потенцира дека е потребна лична и директна комуникација за да се види што понатаму.

„Па сега не сакам да прејудицирам кој, каква ќе биде содржината на разговорите таму. Но во секој случај неопходна е директна и лична комуникација да се има, да се види какви би биле процедурите, што дополнително, евентуално, треба да се направи. Затоа, оваа комуникација е лична и е создадена во рамките на меѓународната соработка со релевантните братски институции со кои соработуваме и со кои имаме билатерални договори за комуникација, вели Џафери во интервју за АИМ.

Од Министерството за правда за АИМ потврдија дека Љога ќе биде во официјална посета на Турција на 8 февруари заедно со претставници на правосудството. Тој ќе се сретне со министерот за правда на Република Турција, а предвидени се средби и со претседателот на Собранието, со претседателите на Уставниот и Врховниот суд, како и со претставници на Академијата за судии и јавни обвинители.

Од Министерството за правда потенцираат дека не можат да споделуваат официјални информации за тоа кога Палевски ќе биде екстрадиран и колку време може да остане во Турција, ова е прашање на турските власти според нивните закони. По доаѓањето во земјава, Палевски со судска одлука ќе биде испратен во ИЕВП и постапката ќе продолжи пред правосудните органи.