Грчката полиција откри повеќе од 270 килограми кокаин во солунското пристаниште и уапси тројца членови на меѓународна банда.
Според извештаите, грчката полиција открила 271 килограм и 150 грама кокаин, со проценета вредност од над 5,5 милиони евра, во контејнер со пратка од Латинска Америка што пристигнала во пристаништето во Солун , а уапсени се и тројца членови на меѓународна криминална организација.
Грчката полиција соопшти дека е разбиена криминална организација откако биле користени информации добиени од Националната агенција за борба против криминалот на Велика Британија „во врска со транспорт и увоз на контејнери со голема количина кокаин по море од латиноамериканска земја до пристаништето во Солун“.
Во среда беше спроведена голема операција и беше пронајден контејнер во кој дрогата беше скриена во посебен оддел, а членови на криминалната организација беа уапсени во саботата во предградие на Атина.
„Тројцата уапсени, на возраст меѓу 32 и 47 години, имале специфични улоги во увозот и трговијата со дрога. Нелегалната финансиска добивка на членовите на организацијата од продажбата на конфискуваната количина кокаин се проценува на повеќе од 5.500.000 евра“, се вели во полициското соопштение.
