Годишниот одмор за пратениците официјално заврши. Работата на Законодавниот дом започнува денес со состанок на претседателот на Собранието, Африм Гаши, со парламентарните известители, на кој тој ќе информира за тековните активности во законодавниот дом, по редовна координација со координаторите на пратеничките групи. На веб-страницата на Собранието, освен брифингот со новинарите, Собранието нема планирано други активности до крајот на неделата.
Пратеничкиот одмор беше прекинат на 16 август кога беше свикана вонредна седница за Предлог-законот за измени и дополнувања на Изборниот законик, по скратена постапка која не помина поради недостаток на Бадентерово мнозинство. Претходно, на 13 август, седница одржа и Комисијата за избори и именувања, која формираше Комисија за избор на кандидати за претседател на Државната комисија за спречување на корупцијата. Вообичаено, пратеничкиот одмор започнува по националниот празник Илинден.
На 9 август, претседателот на Собранието Гаши ги објави локалните избори за 19 октомври. Се очекува Собранието да одржи пленарни и комисиски седници пред почетокот на кампањата за локалните избори на 29 септември.
На последниот брифинг со новинарите, претседателот на Собранието потсети дека законодавниот дом е во постојана седница и дека доколку е потребно, пратениците ќе бидат повикани на седници.
