САД и Русија разговараат за можно враќање на американските компании на рускиот нафтен пазар, како дел од поширок дијалог насочен кон завршување на војната во Украина, изјавија за „Фајненшл тајмс“ (FT) американски претставници запознаени со ова прашање.
Еден функционер изјави дека претставниците на американскиот претседател Доналд Трамп „разговарале за економски предлози од двете страни во конфликтот, вклучително и повоена економска рамка за создавање долгорочен раст и можности за инвестиции за Украина, како и потенцијални можности за повоена економска соработка со Русија“.
„Економските договори би биле дел од сеопфатна мировна рамка и би зависеле од таа рамка, за да се запрат убиствата во оваа брутална војна. Ништо сè уште не е финализирано“, рече функционерот.
Според двајцата соговорници, Москва ги гледа овие деловни аранжмани како поттик за Трамп да ги нормализира односите со Русија пред крајот на војната.
Белата куќа и Кремљ наговестија дека заедничкото вложување меѓу американските и руските нафтени гиганти покрај брегот на Сахалин, остров на Далечниот Исток, би можело да се обнови по завршувањето на војната.
Тие, исто така, разговараа за вклучување на американските нафтени компании во планот за продолжување на испораките на руска нафта во Европа преку нафтоводот „Дружба“ , додадоа соговорниците.
Сепак, многу од договорите што се дискутираат имаат мали шанси да бидат реализирани, со оглед на непопустливоста на рускиот претседател Владимир Путин за прекин на војната во Украина, како и претпазливоста на американските компании кога станува збор за враќање на рускиот пазар, проценува „Фајненшл тајмс“.
Други предлози вклучуваат враќање на пристапот до рускиот воздушен простор за американските авиокомпании за транзит и прелети, што значително би ги намалило трошоците за гориво.
Еден од предлозите вклучува обновување на соработката на американските компании со Русија во производството и испораката на титаниум, кој е клучна компонента за цивилните авиони.
Овие идеи, кои се само дел од оние што ги дискутираат американските и руските претставници, без директно вклучување на Украина или европските земји, би претставувале драстичен пресврт во односите меѓу Москва и Западот по години изолација.
САД изјавија дека Русија и Украина ќе мора да се согласат за прекин на војната пред да може да следи целосно економско закрепнување. Досега, САД веќе склучија договор за увоз на руски дизел, го суспендираа воведувањето нови санкции за извозот на руска енергија и извршија притисок врз Украина да ги запре нападите со беспилотни летала врз руските рафинерии.
