Еден од најдолгите пешачки мостови во светот неодамна беше отворен во Хелсинки, донесувајќи ново, впечатливо архитектонско решение и подобрувајќи ја поврзаноста на делови од градот.
Зборуваме за мостот Круунувуоренсилта, кој со своите 1.191 метар е најдолгиот и највисокиот мост во Финска.
Оваа модерна градба ги поврзува областите Коркеасаари и Круунувуренранта, а интересно е што е наменета исклучиво за пешаци, велосипедисти и јавен превоз, додека автомобилскиот сообраќај е целосно исклучен.
Изградбата на мостот значително го скрати растојанието помеѓу Круунувуренранта и центарот на градот од претходните 11 километри на само пет и пол, што се очекува да овозможи полесно и побрзо движење на жителите, како и дополнителен развој на овој дел од Хелсинки, пренесува Euronews.
Градоначалникот на Хелсинки, Даниел Сазонов, истакна дека мостот претставува „нов, уникатен и возбудлив симбол на градот“, нагласувајќи ја неговата важност не само за инфраструктурата, туку и за идентитетот на главниот град.
Овој проект е дел од пошироката стратегија на Хелсинки за поттикнување на одржлив транспорт и намалување на зависноста од автомобили, со поголем фокус на јавниот превоз, велосипедските и пешачките патеки. Новиот мост, исто така, се вклопува во трендот на модерните европски градови кои сè повеќе инвестираат во зелена инфраструктура и урбан развој прилагоден за луѓето.
Се очекува мостот Круунувуоренсилта наскоро да стане не само важна сообраќајна врска, туку и една од препознатливите туристички атракции на градот.
