Поранешните кинески министри за одбрана Веи Фенгхе и Ли Шангфу се осудени на смртна казна со двегодишна суспензија од извршување по обвинение за корупција, објави кинеската државна новинска агенција Ксинхуа.
Оваа пресуда дополнително го покажува обемот на сузбивањето на корупцијата во кинеската војска, што го спроведува кинескиот претседател Си Џинпинг откако ја презеде власта во 2012 година.
Кинеските вооружени сили со години се меѓу главните цели на антикорупциските чистки, а во 2023 година беа испитани и елитните ракетни сили одговорни за нуклеарно и конвенционално оружје.
Според претходните извештаи на Синхуа, Ли Шангфу бил обвинет за примање „огромни суми пари“ преку мито, како и за поткупување на други лица. Истрагата покажала дека тој не ги исполнил своите политички одговорности и дека ја користел својата позиција за да обезбеди персонални привилегии за себе и за другите.
Од друга страна, истрагата против Веи, започната во 2023 година, откри дека тој примил големи количини пари и вредни предмети во замена за услуги и им помагал на другите да стекнат нелегални бенефиции преку назначувања во персоналот. Синхуа ги опиша неговите постапки како „исклучително сериозни“, со „огромна штета и многу негативно влијание“.
Кинеските власти појаснија дека смртната казна со двегодишно одложување генерално се заменува со доживотен затвор ако осудените не извршат нови кривични дела во тој период. Откако казната ќе биде заменувана, тие нема да имаат можност за понатамошно ублажување на казната ниту право на условна слобода.
Антикорупциската кампања во кинеската армија беше дополнително засилена на почетокот на оваа година, кога еден од највисоките кинески генерали, Џанг Јуксија, долгогодишен сојузник на претседателот Си и член на Политбирото, беше отпуштен.
Меѓународниот институт за стратешки студии претходно оваа година предупреди дека тековните чистки против корупција имаат сериозни последици за командната структура на кинеската војска и веројатно ќе ја забават подготвеноста и модернизацијата на вооружените сили.
