Серија експлозии го потресоа рускиот град Воронеж попладнево.
Според руските канали на Телеграм, погодена е воена фабрика која произведува компоненти за ракети, пренесува РБЦ.
Околу 12 часот, жителите на Воронеж почнаа да пријавуваат експлозии. Според извештаите на интернет, високи столбови чад се издигаат над местото на нападот. Фотографии и видеа од наводните напади се појавија на социјалните мрежи.
Провладиниот руски Телеграм канал База тврди дека Воронеж бил нападнат со ракети „Сторм Сендвуд“, иако нема официјална потврда за оваа информација. „Сторм Сендвуд “ е англо-француска крстосувачка ракета со максимален дострел од околу 250 километри, а Французите ја нарекуваат „скалп“.
Други извори известуваат дека цел на нападот била фабриката за полупроводници „Сборка“ од Воронеж, која е под меѓународни санкции. Оваа фабрика произведува електронски компоненти што се користат во контролните системи на руските ракети Искандер-К, Х-101 и Калибар. Покрај тоа, нејзините производи се вградени во воени радари, системи за воздушна одбрана С-400 и компјутерски системи што контролираат крстосувачки ракети.
Руските власти го потврдија нападот врз Воронежската област. Гувернерот на регионот објави дека, според властите, неколку брзи воздушни цели биле уништени над територијата на регионот. Тој исто така изјави дека една компанија претрпела штета. Според него, три лица се повредени во инцидентот. Сепак, тој не прецизираше кој објект бил вклучен или која компанија била погодена.
Воронежската област и претходно беше цел на напади. Така, на пример, во јануари, најмалку 20 моќни експлозии одекнаа на небото над градот, а ги слушнаа жителите на различни населени места. Руските сили за воздушна одбрана се обидоа да ги соборат беспилотните летала. Во тоа време, локалните власти не дадоа детали за последиците од нападот.
