Украинскиот претседател Володимир Зеленски изјави дека неговата земја би можела да ги уништи руските системи за лансирање балистички ракети доколку ѝ биде одобрен пристап до сателитската услуга „Старлинк“ на руска територија.
„Дајте ни го Старлинк со можност за работа на руска територија и ние ќе ги уништиме нивните системи за лансирање балистички ракети“, изјави тој.
Украинскиот лидер го нарече прекинувањето на услугата Starlink многу сериозна грешка, нагласувајќи ја важноста на овој систем за воените операции на Украина.
Зборувајќи за нафтената криза, украинскиот претседател рече дека нејзините причини се поврзани со случувањата на Блискиот Исток, особено со Иран, а не со Украина.
Зеленски зборуваше и за односите со американскиот претседател Доналд Трамп, велејќи дека тој е искрен партнер на Соединетите Американски Држави поради стратешката важност на Украина, а не поради лични симпатии.
Тој исто така изјави дека ниедна европска земја не е способна да се одбрани од ирански ракети и беспилотни летала со дострел од над 4.000 километри. Според него, Украина е подготвена да ги сподели потребните информации за да им помогне на европските партнери.
Во врска со домашната политика, Зеленски рече дека нема намера да остане претседател уште многу години, оценувајќи дека дискусиите за изборите во овој момент се погрешни.
Украинскиот претседател го опиша рускиот претседател Владимир Путин како непријател на Украина и го критикуваше неговиот однос со Трамп, нарекувајќи го пријателството меѓу двајцата лидери грешка.
Конечно, Зеленски нагласи дека воената моќ не е ограничена само на физичко оружје, туку ги вклучува и финансиските ресурси што овозможуваат негово купување.
