Наместо одговор за лиценцата, тој рече дека Киев и Москва треба да постигнат договор за прекин на конфликтот.
Американскиот претседател Доналд Трамп не потврди дали одобрил производство на ракети-пресретнувачи „Патриот“ во Украина, како што тврдеше украинскиот претседател Володимир Зеленски еден ден претходно.
Трамп рече дека за време на состанокот на маргините на Генералното собрание на Обединетите нации, тој и Зеленски разговарале за ракетите „Патриот“, но наместо да одговори за евентуалната лиценца, тој рече дека ги повикал Киев и Москва да постигнат договор за прекин на конфликтот, пренесува Си-Ен-Ен.
„За што сакам тој да се погрижи? Да склучи договор. Сакам тој да склучи договор со рускиот претседател Владимир Путин, а сакам и Путин да склучи договор со него“, им рече Трамп на новинарите пред да замине на натпревар од американски фудбал во Тенеси.
Зеленски во петокот изјави дека Трамп му рекол за време на состанокот дека Украина ќе добие дозвола за производство на ракети „Патриот“.
Белата куќа сè уште не потврди дали е постигнат таков договор.
