Кафето е суштински дел од секојдневниот живот на многу луѓе, но кофеинот што ни помага да останеме будни може да влијае и на квалитетот на нашиот сон. Затоа често се поставува прашањето дали престанокот со пиење кафе може да ни го подобри ноќниот одмор и дали треба целосно да се откажеме од омилениот пијалок.
Престанувањето со кафе може да го подобри сонот, особено кај луѓето кои пијат неколку шолји на ден или консумираат кофеин доцна попладне. Нутриционистката Кортни Смит истакнува дека истражувањата покажуваат дека кофеинот може да го скрати вкупното време на спиење за околу 45 минути, да го отежни заспивањето и да го зголеми бројот на ноќни будења. Сепак, неговиот ефект зависи од количината, времето на консумирање и индивидуалната чувствителност, пишува EatingWell.
Целосно откажување не е потребно
Д-р Саема Тахир објаснува дека најголемите подобрувања може да се забележат кај луѓе кои го метаболизираат кофеинот побавно или го пијат подоцна во текот на денот.
,,Оние кои го метаболизираат брзо и го пијат само наутро може да не забележат никаква разлика“, вели таа.
Таа додава дека наглото прекинување со пиење кафе може да предизвика главоболки, замор и раздразливост, а симптомите може да траат до девет дена.
Сепак, целосното откажување од кафе не е потребно.
„Истражувањата покажуваат дека умереноста е често најдоброто решение“, истакнува Тахир.
Студија од 2023 година покажа дека кафето треба да се консумира најмалку девет часа пред спиење, а нутриционистката Лавања Кетамукала советува да се пијат помали порции или да се премине на кафе без кофеин подоцна во текот на денот.
Други навики, како што се распоредот на спиење, изложеноста на светлина, физичката активност и консумирањето алкохол, исто така влијаат на квалитетот на спиењето.
„Алкохолот може да ви помогне да заспиете побрзо, но исто така може да ја наруши структурата на спиењето и да го потисне REM спиењето подоцна во текот на ноќта“, предупредува Тахир.
Кетамукала заклучува дека многу луѓе не треба целосно да се откажат од кафето, туку едноставно можат да го прилагодат времето и количината на консумирање.
