Пиењето вода од пластични шишиња, покрај тоа што штети на животната средина, може да претставува и сериозен здравствен ризик. На ова предупредува италијанскиот специјалист за заразни болести Матео Басети, кој проценува дека секоја недела внесуваме во нашето тело количина микропластика еднаква на тежината на кредитна картичка, пишува Аѕ.
Басети, доктор во болницата „Сан Мартино“ во Џенова, објаснува дека проблемот честопати не е самата вода. „Дали знаете што има во пластичните шишиња? Во 64 проценти од случаите тоа е вода од чешма што ја имате дома, на која можеби е додаден филтер за подобрување на вкусот“, вели тој.
Проблемот лежи во пакувањето и долгото складирање. Флашираната вода трае помеѓу една и пет години во просек, а шишињата честопати не се чуваат безбедно.
,,Тие често се оставаат надвор и се изложени на сонце, што предизвикува пластиката да достигне високи температури“, вели Басети.
Како резултат на тоа, додава тој, „пластичните честички продираат во самата течност“.
Влијание врз здравјето
Внесувањето на микропластика во телото, според Басети, може да има сериозни последици.
„Тие предизвикуваат воспаление“, истакнува тој, објаснувајќи дека со текот на времето ова може да доведе до развој на хронични воспалителни состојби.
Иако пластичните шишиња може да бидат тешки за избегнување, Басети советува да не се користат секојдневно, особено дома.
„Пијте вода од чешма и, секогаш кога имате избор, секогаш изберете стакло. Тоа е несомнено подобро од пластиката и не ослободува микрочестички кои, ве потсетувам, предизвикуваат воспаление низ целото тело“, заклучи тој.
