Нова студија објавена во списанието eBioMedicine покажа дека додатоците во исхраната со рибино масло не го забавуваат значително когнитивниот пад или промените во мозокот поврзани со Алцхајмеровата болест.
Истражувачите следеле 365 возрасни лица на возраст од 55 до 80 години кои имале зголемен ризик од Алцхајмерова болест и консумирале мали количини храна богата со омега-3 масни киселини . Околу половина од учесниците го носеле и генот APOE4, најсилниот генетски фактор на ризик за развој на оваа болест.
Во текот на две години, учесниците земале или додатоци во исхраната со висока доза на докозахексаеноична киселина (DHA), клучна омега-3 масна киселина важна за функцијата на мозокот, или плацебо. Пред почетокот на истражувањето, биле извршени магнетна резонанца, како и тестови за меморија и когнитивни способности.
По шест месеци, луѓето кои земале рибино масло имале просечно зголемување од 17 проценти во нивоата на DHA во нивната цереброспинална течност, што укажува дека омега-3 масните киселини стигнале до централниот нервен систем. Сепак, по две години, тестовите за следење не покажале значајна разлика помеѓу групата со додаток во исхраната и групата со плацебо.
Додатоците, исто така, не го забавија намалувањето на волуменот на хипокампусот, маркер поврзан со Алцхајмеровата болест. Авторите на студијата велат дека рибиното масло можеби не е доволно за да го заштити мозокот од болести кои се под влијание на стареењето, генетиката, начинот на живот и факторите на животната средина.
Авторот на студијата, Хусеин Наџи Јасин, директор на Центарот за персонализирано здравје на мозокот на USC, изјави:
„Сметаме дека недостатокот на придобивки укажува на потребата од посеопфатен пристап. Овие резултати сугерираат дека треба помалку да се фокусираме на пристапи базирани на еден додаток, а повеќе на целокупните здрави навики во начинот на живот кои придонесуваат за здравјето на мозокот.“
Експертите наведуваат дека додатоците во исхраната со рибино масло не треба да се препорачуваат само за превенција од Алцхајмерова болест или за зачувување на когнитивните функции. Наместо тоа, тие препорачуваат поголем дел од храна богата со омега-3 масни киселини, како што се масна риба, семе од чиа и ореви, со совет од лекар дали е потребен додаток во исхраната во одреден случај.
