Грчки контејнерски брод потона откако беше удрен од поморски дрон покрај брегот на Бугарија во среда, објави бугарската влада.
Ова е најновиот во серијата напади во западниот дел на Црното Море овој месец, кои предизвикаа загриженост за проширувањето на обемот на руската војна во Украина.
Според странските медиуми, бродот „КОНТШИП ЏЕТ“, кој пловел под знамето на Либерија и носел 421 контејнер, претрпел сериозни оштетувања од три поморски дронови додека минувал низ ексклузивната економска зона (ЕЕЗ) на Бугарија – но надвор од нејзините територијални води – за време на своето патување од Хаифа (Израел) до Констанца (Романија).
Екипажот, составен од 14 Филипинци и четворица Украинци, беше спасен и безбедно однесен во бугарското пристаниште Варна, објави компанијата „Контшипс Менаџмент“.
И некои снимки објавени на социјалните медиуми наводно покажуваат поморски дрон како се движи паралелно со бродот, пред да се сврти кон неговото тело.
Во друго видео се гледа експлозија, која предизвикува навалување на бродот.
Не беше веднаш јасно кој го извршил нападот, што додава на растечката загриженост за влијанието на руската војна во Украина врз комерцијалниот превоз во областа.
Според владини изјави, најмалку шест брода биле нападнати од дронови крај брегот на Бугарија овој месец, додека се сомнева дека околу дваесетина морнари ги загубиле животите.
Иако не е точно познато кој ги извршил нападите, бугарскиот премиер Румен Радев изјави дека некои од нив се чини дека им служат на руските интереси.
Москва негираше вмешаност во последните напади и не даде непосреден коментар за инцидентот во среда.
