Кинескиот стартап за вештачка интелигенција „Манус“ собра повеќе од 500 милиони долари, или околу 430 милиони евра, во нова рунда финансирање, објави „Ројтерс“.
Новата инвестиција доаѓа откако матичната компанија на „Манус“, „Батерфлај Ефект“, го раскина договорот за преземање со американската компанија „Мета“, вреден повеќе од 2 милијарди долари (околу 1,72 милијарди евра). „Манус“ оттогаш продолжи со работа како независна компанија.
Манус развива агенти за вештачка интелигенција со општа намена кои можат автономно да извршуваат различни задачи, вклучувајќи истражување, анализа и автоматизација, со минимална интервенција на корисникот.
Кинеските власти во април ѝ наредија на „Мета“ да го откаже планираното преземање на „Манус“, во време кога има зголемена контрола врз инвестициите на американските компании во кинески стартапи кои развиваат напредни технологии за вештачка интелигенција.
„Манус“ објави во август дека повторно ќе работи како независна компанија. Како дел од одвојувањето од „Мета“, компанијата објави и бришење на некои кориснички податоци.
Според Ројтерс, годишните приходи на „Манус“ достигнале околу 500 милиони долари, додека во времето кога „Мета“ планирала да ја преземе компанијата, тие изнесувале околу 100 милиони долари.
