Индиската градежна компанија „Афконс Инфраструктура Лимитед“ е избрана за изведувач на работите за реконструкција на постојната и изградба на втората пруга од железничката пруга Дуго Село – Новска, соопшти „ХЖ Инфраструктура“.
Тие истакнаа дека ова е најголемиот железнички проект во историјата на Хрватска.
Понудата на споменатата компанија, во износ од 677,06 милиони евра без ДДВ, е избрана како економски најповолна. Откако одлуката ќе стане конечна, се потпишува договорот. По воведувањето на изведувачот во работата, очекуваното времетраење на работите е пет години и десет месеци.
Покрај целосната реконструкција на постојната и изградбата на втората пруга на меѓународната железница, работите вклучуваат реконструкција на станиците и постојките, нивелирање или укинување на повеќето железничко-патни премини, изградба на ѕидови за заштита од бучава, поставување на нови уреди и други елементи од системот за управување со сообраќајот и подсистемот за сигнално-безбедносна железничка инфраструктура, како и реконструкција и изградба на нови елементи и уреди од подсистемот за електрична железничка инфраструктура.
По завршувањето на работите, брзината на делницата Дуго Село – Новска ќе биде до 160 км/ч.
