Саудиска Арабија се спротивстави на тоа Египет да се приклучи на безбедносниот договор потпишан од Турција и Пакистан минатата недела, и покрај напорите на Анкара да го вклучи Каиро во алијансата, пишува „Мидл Ист Ај“.
Според овој весник, саудискиот став е резултат на растечкото незадоволство од владата на претседателот Абдел Фатах ел-Сиси, како и на проценката дека Египет повеќе нема стратешка и воена вредност каква што ја имаше некогаш.
Договорот предвидува дека Саудиска Арабија, Турција и Пакистан ќе го третираат вооружениот напад врз една од трите земји како напад врз сите три.
Саудиските власти го опишаа како механизам за зајакнување на заедничките одбранбени капацитети, иако договорот не ги специфицира оперативните механизми, специфичните околности што би предизвикале заеднички одговор или како би се обезбедила воена помош во случај на криза.
Противставувањето на влезот на Египет е резултат на долгогодишните тензии меѓу Ријад и Каиро.
Саудиска Арабија беше најголемиот финансиски поддржувач на владата на Сиси откако тој ја презеде власта со воен удар во 2013 година, првично издвојувајќи околу 25 милијарди долари за поддршка на египетската економија.
Сепак, Ријад е сè повеќе незадоволен од она што го смета за недостаток на реципрочна поддршка од страна на Египет за клучните безбедносни прашања.
Особено беше нагласена „минималната и несигурна“ улога на Египет во саудиската војна против јеменските Хути, како и нивното однесување за време на американско-израелската војна против Иран.
Ријад е дополнително загрижен за близината на Каиро и Обединетите Арапски Емирати. Ова е особено изразено по влошувањето на односите меѓу Саудиска Арабија и ОАЕ поради поддршката на Абу Даби за сепаратистичките групи на југот на Јемен, што Ријад го смета за закана за неговата национална безбедност.
„Мидл Ист ај“ наведува дека по иранските напади, Египет испратил системи за противвоздушна одбрана и борбени авиони во ОАЕ, додека Сиси го посетил претседателот на ОАЕ, Мохамед бин Зајед, неколку пати за време на војната. Слични потези кон Саудиска Арабија не се регистрирани.
Ријад, исто така, верува дека одредени политики на ОАЕ не се во согласност со египетските стратешки интереси, вклучувајќи го ангажманот на Емиратите во Сомалиленд, стратешките односи со Израел, поддршката за Етиопија во спорот за браната Нил и поддршката за Силите за брза поддршка (RSF) во Судан.
Турскиот министер за надворешни работи, Хакан Фидан, во саботата изјави дека Каиро е „природен партнер“ на Анкара и дека нема причина Египет да не стане дел од алијансата во иднина, откако ќе се решат техничките прашања.
Неколку турски претставници потврдија за „Мидл Ист Еј“ дека Анкара вложила значителни напори за вклучување на Египет и формално предложила негово учество. Сепак, кога стана јасно дека Каиро не е подготвен да се приклучи, другите земји одлучија да продолжат без Египет.
Од друга страна, саудиските власти го оспоруваат тврдењето дека самиот Египет го отфрлил договорот. Поранешен советник на саудиската монархија ја нарече таквата можност „смешна“, тврдејќи дека Сиси со задоволство би го потпишал договорот за финансиска добивка.
Во исто време, саудиските власти веруваат дека Турција и Пакистан можат да дадат поголем воен придонес во алијансата. Турција има развиена одбранбена индустрија, додека Пакистан има голема војска и развиен сектор за производство на оружје. Капацитетот за воено производство на Египет, според нивната проценка, се карактеризира со поголем фокус на цивилно производство и пониско ниво на напредна воена технологија.
Пошироката саудиска проценка се вклопува со сè поизразените ставови за слабеењето на регионалната улога на Египет. „Економист“ неодамна оцени дека земјата, која со децении се претставуваше како еден од столбовите на регионалниот поредок, денес е турната настрана како медијатор и воена сила.
Сепак, сите извори на „Мидл Ист Еј“ нагласија дека договорот не ја затвора вратата за Египет засекогаш. Ставот на Ријад е дека Каиро засега треба да остане надвор од алијансата, додека евентуалното приклучување би можело да се разгледа во иднина доколку односите се променат и Египет стане посигурен.
