Просечната месечна нето плата исплатена по вработен во Загреб за март оваа година изнесувала 1.790 евра, според податоците од Градскиот завод за статистика на хрватскиот главен град.
Како што е наведено, ова е номинален раст од 2,1 процент во споредба со февруари и зголемување од 6,7 проценти во споредба со март минатата година, објавува порталот Индекс.
Средната нето плата за март оваа година изнесувала 1.497 евра, што значи дека половина од вработените жители на Загреб имале помалку, а половина повеќе од таа сума.
Според податоците на Градската служба за економија, одржливост на животната средина и стратешко планирање, највисоката просечна месечна нето плата за март годинава е исплатена во финансиски услуги, освен во осигурување и пензиски фондови, во износ од 2.535 евра.
Најниска просечна нето плата е исплатена во производството на облека, во износ од 1.021 евра. Во споредба со просечната месечна плата за март оваа година во Хрватска, која изнесуваше 1.555 евра, просечната нето плата во Загреб исплатена за тој месец е за 235 евра повисока.
Просечната месечна бруто плата по вработен во Град Загреб за март годинава изнесуваше 2.584 евра, што е зголемување од 2,3 проценти во споредба со февруари и зголемување од 7,2 проценти во споредба со минатиот март.
