Кристијано Роналдо наскоро би можел да стане косопственик на Ал-Наср, клубот за кој игра од јануари 2023 година.
Американскиот финансиски портал „Семафор“ објави дека „РедБирд Капитал Партнерс“, сопственикот на Милан, е во преговори за преземање на 70 проценти од саудискиот клуб. Конзорциумот предводен од „РедБирд“ одржал најмалку два состанока со Саудискиот јавен инвестициски фонд (PIF), моменталниот мнозински сопственик на клубот.
Договорот наводно вреди околу 1 милијарда ријали, или околу 267 милиони долари. Роналдо би можел да добие до 20 проценти од клубот во новата сопственичка структура, но неговиот удел сè уште не е договорен. Како можен инвеститор се споменува и „Сауди Медиа Компани“ од Ријад.
Ал-Наср е во сериозни финансиски проблеми. Долговите на клубот се проценуваат на околу 800 милиони ријали, или 213 милиони долари. ПИФ се обидува да ги намали со потпишување нови спонзорски договори со компании од своето портфолио пред евентуална продажба.
„Долговите на Ал Наср се приближуваат до 800 милиони ријали“, изјави саудискиот новинар Валид Ал-Фараџ во емисија на „Ротана спорт“.
Преговорите се уште се во почетна фаза и нема гаранција дека ќе се постигне договор.
ПИФ ја презеде контролата врз Ал-Наср, Ал-Хилал, Ал-Итихад и Ал-Ахли во 2023 година. Ова беше во време кога саудиската лига почна да ги привлекува најголемите ѕвезди во светот.
