Претседателката на Република Македонија, Гордана Силјановска-Давкова, во својот говор на 22-от Европски самит во Салцбург, во сесијата на тема „Дали Европа (сè уште) е глобален играч?“, рече дека ниедна европска земја на својот пат кон интеграција не понела толку тежок товар како Македонија.
„Ниту една европска земја на патот кон интеграцијата не понела толку тежок товар како нас: го сменивме државното знаме, уставното име и усвоивме 36 уставни амандмани, од кои повеќето беа диктирани од странство“, нагласи Гордана Силјановска-Давкова.
Таа зборуваше за иднината на европскиот проект, стратешките предизвици со кои се соочува Европската Унија и потребата од забрзување на европската интеграција на Западен Балкан како прашање над кое Унијата има целосна контрола и моќ за донесување одлуки.
Осврнувајќи се на европскиот пат на земјата, претседателот потсети дека од 35 години независност, цели 21 година сме кандидат за членство во Европската Унија, со 17 позитивни извештаи за почеток на преговорите, висок степен на усогласеност со европското законодавство и стопроцентно почитување на заедничката надворешна и безбедносна политика, како и дека земјата е меѓу најуспешните во европските реформи и во спроведувањето на Планот за раст на Западен Балкан.
„Принудувањето на држава да ја промени својата внатрешна правна структура за да реши историски спор покренува сериозни прашања за одржливоста на европските принципи. Член 4(2) од Договорот за ЕУ ја обврзува Унијата да ја почитува еднаквоста на земјите-членки и нивните национални идентитети, како што се отелотворени во нивните фундаментални политички и уставни структури. И сепак, во нашиот случај, уставната промена условена од билатерален историски спор се претставува како тест за нашиот демократски капацитет“, рече Силјановска-Давкова.
