Иако повеќето луѓе лесно ги игнорираат советите на стоматолозите за исхрана, експертите сè повеќе предупредуваат дека некои навики всушност можат да имаат сериозни последици по здравјето на забите. Една секојдневна навика особено се издвојува, која многумина не ја сметаат за опасна, но која полека, но сигурно, може да ви ја оштети насмевката.
Стоматолозите од Торнли Парк Дентал, семејна ординација во Манчестер, во видео открија што никогаш не би направиле со оглед на нивното знаење и искуство. Првата вработена, Маси, без двоумење ги издвои енергетските пијалоци. Кога ја прашале дали се „прилично лоши за луѓето“, таа кратко потврдила: „Тие се“.
Друг стоматолог, Алан, исто така ги издвои енергетските пијалоци како навика што денес генерално би ја избегнувал.
,,Ги пиев во големи количини како тинејџер и сега имам многу оштетувања на забите. Во тоа време не бев свесен што навистина се случува, дури подоцна, како стоматолог, сфатив колку штета можат да направат“, рече тој.
Зошто енергетските пијалоци се толку штетни?
Енергетските пијалоци комбинираат високо ниво на шеќер и висока киселост, што ги прави особено агресивни за забната глеѓ. Оваа комбинација постепено го еродира заштитниот слој на забите, што може да доведе до неповратно оштетување, зголемена чувствителност и значително поголем ризик од кариес.
Двоен удар во забите
Главната стоматолошка сестра и едукатор на Универзитетот Нортумбрија, Паула Даркин, објаснува дека шеќерите од храната и пијалоците се претвораат во киселина во устата, која ја напаѓа глеѓта. „Со текот на времето, оваа киселина полека го разградува заштитниот слој на забите и го отвора патот за развој на кариес“, објасни таа.
„Енергетските пијалоци се особено проблематични бидејќи содржат многу шеќер и високо ниво на киселост во исто време. Ова значи дека тие предизвикуваат и расипување на забите и ерозија“, предупреди таа.
Таа додаде дека треба да се биде претпазлив дури и со пијалоци без шеќер: „Дури и газираните пијалоци без шеќер можат да им наштетат на забите. Иако немаат шеќер, нивната киселост сепак може да предизвика ерозија на глеѓта.“
