Администрацијата на американскиот претседател Доналд Трамп привремено го запре проектот „Слобода“ во Ормутскиот теснец, откако, според американските претставници, е постигнат значителен напредок во преговорите со Иран за нуклеарната програма.
Како што објави „Волстрит џурнал“, Соединетите Американски Држави му доставија на Техеран нов рамковен предлог за договор за нуклеарното прашање. Доколку Иран го прифати понудениот документ, ќе следат интензивни 30-дневни преговори за деталите од конечниот договор.
Според информациите протечени од американските дипломатски кругови, Вашингтон дефинирал осум клучни „црвени линии“ што Иран ќе мора да ги прифати.
Меѓу главните барања на САД е официјална потврда од Иран дека не развива нуклеарно оружје, целосно демонтирање на нуклеарните постројки во Фордоу, Натанц и Исфахан, како и целосна забрана за подземни нуклеарни активности.
Предлогот на САД вклучува и ненајавени инспекции на нуклеарните постројки со строги казни за потенцијално кршење на договорот и 20-годишен мораториум за збогатување на ураниум. Претходно, според медиумите, се инсистираше на трајна забрана.
Едно од барањата се однесува на предавање на сите постоечки залихи на збогатен ураниум, додека отворањето на Ормуз за меѓународен сообраќај би било координирано со постепено олеснување на американската поморска блокада.
Вашингтон јасно посочи дека евентуалното укинување на санкциите нема да биде автоматско или гарантирано однапред, туку ќе зависи од степенот до кој Иран ќе ги спроведе своите обврски.
Иако операцијата за обезбедување на Ормутскиот теснец во моментов е во мирување, американската поморска блокада на иранските пристаништа останува на сила до понатамошно известување.
Позитивните сигнали од преговорите веднаш се одразија на глобалниот енергетски пазар. Цените на нафтата паднаа за речиси осум проценти, односно на околу 101 долар за барел, откако инвеститорите проценија дека постои реална можност за постигнување договор меѓу Вашингтон и Техеран.
